Obama varð að víkja

Dóttir mín flaug frá Íslandi í gær til Kastrup flugvallar og þaðan tók hún lest áfram til Álaborgar. Eins og mörgum er kunnugt um, þá var loftslagsráðstefna nokkur á fullu í Kaupmannahöfn í gær og höfðu fjölmiðlar varað við töfum af þeim völdum og einnig við töfum vegna veðurs. Jótlandspósturinn hafði meðal annars fyrirsögnina: "Obama og sne giver forsinkelser". Ýmsir þjóðarleiðtogar aðrir en Obama voru einnig á ferðinni og því víða tafir. Ég ákvað að slá þessu upp í létt grín í vinnunni í gærmorgun og tók upp símann og þóttist hringja og talaði síðan eins og ég væri að tala við flugumferðarstjórn á Kastrup nærstöddum vinnufélögum til mikillar furðu. Ég bað "flugumferðarstjórn" um að sjá til þess að flug dóttur minnar hefði forgang gagnvart flugi Obama og að hann yrði látinn hinkra í þessar 10 til 20 mínútur sem dóttir mín þyrfti til að komast í gegnum flugstöðina. Engu er líkara en þetta ímyndaða símtal mitt hafi virkað því flug dóttur minnar var nánast eina flugið sem ekki varð fyrir röskun á Kastrup í gær! Hún náði því lestinni á réttum tíma, en veðurguðirnir létu sér fátt um "símtalið góða" finnast og tókst að seinka lestinni um rúmar 20 mínútur vegna snjóþyngsla á Fjóni.

Lestarferð dótturinnar gekk að öðru leyti ljómandi vel og þegar yfirlestarvörðurinn (eða "togføreren" eins og það heitir á dönsku) kom til þess að skoða miðann hennar, spurði hann þegar hann sá nafn hennar hvort hún væri íslensk. Hún játti því enda sennilega einn harðasti Íslendingur sem er uppi nú á tímum. Þá ljómaði yfirlestarvörðurinn og tjáði henni að hann væri að fara í sína fyrstu Íslandsför eftir 6 mánuði og að hann væri að farast úr tilhlökkun. Hann hlaut verðskuldað bros að launum frá dóttur minni og vil ég nú biðja Íslendinga alla um að taka vel á móti þessum manni þegar hann birtist á Íslandi næsta sumar.